Þekkir þú phishing-póst frá alvöru pósti?

Fimm atriði sem afhjúpa phishing-póst

Flestir falskir póstar koma upp um sig á einhverju alveg áþreifanlegu. Það er einmitt það sem leikurinn þjálfar þig í að koma auga á — og það gildir líka þegar þú stendur með póst í höndunum núna.

Netfang sendanda, ekki nafnið

Hver sem er getur skrifað nafnið í pósti. Netfangið á bak við það er ekki hægt að falsa. Athugaðu hvort lénið á eftir @ sé raunverulegt lén fyrirtækisins — ekki afbrigði með bandstriki, aukaorði eða annarri endingu.

Það liggur á

Hótun um lokun, frestur í dag, reikningur sem rennur út. Tímapressan er engin tilviljun — hún er þarna til að fá þig til að bregðast við áður en þú nærð að hugsa. Alvöru bréf frá stofnunum og bönkum gefa þér tíma.

Þú átt að skrá þig inn til að laga eitthvað

Hlekkur sem leiðir á innskráningarsíðu er algengasta leiðin til að stela lykilorði. Þurfir þú að skrá þig inn skaltu gera það eins og venjulega — í appinu eða með því að slá slóðina inn sjálf(ur). Aldrei í gegnum hlekkinn í póstinum.

Það er beðið um eitthvað

Kortaupplýsingar, kennitala, staðfesting í rafrænum skilríkjum, greiðsla á nýtt reikningsnúmer. Alvöru sendendur biðja þig ekki um slíkt í pósti — og allra síst fyrirvaralaust.

Það á að opna viðhengi

Reikningur sem þú kannast ekki við, sendingarseðill, skjal sem krefst þess að þú „virkjir efni“. Áttir þú ekki von á skránni skaltu ekki opna hana — hafðu samband við sendandann eftir leið sem þú finnur sjálf(ur).

Svona virkar leikurinn

Þú færð tíu pósta, einn í einu. Sumir eru alvöru, sumir eru phishing. Þú hefur 12 sekúndur á hvern og þrjú líf. Eftir hvert svar færðu að vita hvað afhjúpaði póstinn — eða hvað gerði hann trúverðugan ef hann var ekta. Það er jafn mikilvægt að þekkja póst sem óhætt er að treysta.

Póstarnir eru ekki uppspunnin dæmi. Beitupóstarnir koma úr safninu sem við notum í raunverulega phishing-þjálfun á vinnustöðum, og þeir ekta eru skrifaðir svo þeir passi við það sem raunverulega lendir í íslenskum pósthólfum. Þess vegna eru þeir erfiðir — það er einmitt tilgangurinn.

Af hverju er þetta ókeypis?

Af því að þetta virkar best þegar margir prófa það. Það er enginn aðgangur, ekkert netfang og engin skráning á því sem þú svarar — bara þrír stafir á lista dagsins ef þú kýst það sjálf(ur). Eigi að þjálfa allan vinnustaðinn jafnt og þétt er það sú þjónusta sem við tökum greiðslu fyrir.